local

സര്‍ക്കാരിന്റെ തണലില്‍ ഇനി സന്തോഷ് ട്രോഫി താരം കെ.പി രാഹുലിന് സ്വന്തം ഭവനം

ചെറുവത്തൂര്‍: സന്തോഷ് ട്രോഫി താരം കെ പി രാഹുലിന്റെ വീടെന്ന സ്വപ്നമാണ് യാഥാര്‍ഥ്യമായിരിക്കുന്നത്. സംസ്ഥാന സര്‍ക്കാറിന്റെ നേതൃത്വത്തില്‍ കായിക വകുപ്പിന്റെ കായിക വികസന നിധിയില്‍ നിന്നുള്ള 15 ലക്ഷം രൂപ ചെലവിലാണ് വീടൊരുക്കിയത്. സന്തോഷ് ട്രോഫി താരത്തിന്റെ ദയനീയാവസ്ഥ മനസിലാക്കിയ എം രാജഗോപാലന്‍ എം.എല്‍.എ സ്പോര്‍ട്സ് മന്ത്രിക്ക് നേരിട്ട് നിവേദനം നല്‍കിയതിന്റെ അടിസ്ഥാനത്തില്‍ രാഹുലിന് വീട് അനുവദിച്ച് നല്‍കുകയായിരുന്നു. മിച്ചഭൂമിയിലെ പണിതീരാത്ത വീട്ടില്‍ നിന്നും പുതിയ വീട്ടിലേക്ക് രാഹുലും കുടുംബവും ഈ മാസം എട്ടിന് താമസം മാറും. പിലിക്കോട് കോതോളിയില്‍ നിര്‍മ്മിച്ച വീടിന്റെ പാലുകാച്ചല്‍ ചടങ്ങിന് കായിക വകുപ്പ് മന്ത്രി ഇ.പി ജയരാജനെത്തും. ജില്ലാ സ്പോര്‍ട്സ് കൗണ്‍സിലിനായിരുന്നു വീട് നിര്‍മ്മാണ ചുമതല. 2018 ഏപ്രില്‍ ഒന്നിന് കേരളം സന്തോഷം ട്രോഫി നേടിയപ്പോള്‍ ടീമിലെ മിന്നും താരമായി മാറിയ രാഹുലിന്റെ വീടില്ലാത്ത സങ്കടങ്ങള്‍ വിവിധ മാധ്യമങ്ങള്‍ അധികൃതരുടെ ശ്രദ്ധയില്‍പെടുത്തിയിരുന്നു. ചീമേനി മിച്ച ഭൂമിയിലെ പണി തീരാത്ത കൊച്ചു വീട്ടിലാണ് രാഹുലിന്റെ കുടുംബം കഴിഞ്ഞിരുന്നത്. ജന്മസ്ഥലമായ പിലിക്കോട് കോതോളിയില്‍ അഞ്ച് സെന്റ് സ്ഥലത്താണ് ഇപ്പോള്‍ വീടൊരുക്കിയത്. നിര്‍ണായക മത്സരത്തില്‍ ബംഗാളിനെതിരെ നേടിയ ഒരു ഗോള്‍ ഉള്‍പ്പെടെ നാല് ഗോളുകള്‍ സ്വന്തം പേരില്‍ കുറിച്ചാണ് അന്ന് രാഹുല്‍ സന്തോഷ് ട്രോഫിയിലെ മിന്നുംതാരമായത്. ഇതേ തുടര്‍ന്ന് പ്രഖ്യാപിച്ച സര്‍ക്കാര്‍ ജോലിയില്‍ ഏതാനും മാസങ്ങള്‍ക്ക് മുന്‍പാണ് രാഹുല്‍ പ്രവേശിച്ചത്. ആലംപാടി ഗവ. ഹൈസ്‌കൂളില്‍ ക്ലര്‍ക്ക് ആയാണ് നിയമനം. കൊവിഡ് പ്രോട്ടോകോള്‍ നിലനില്‍ക്കുന്നതിനാല്‍ ലളിതമായ ചടങ്ങ് മാത്രമാണ് ഗൃഹപ്രവേശത്തിനുള്ളത്.

Leave a Reply

Your email address will not be published.

error: Content is protected !!