local

വസന്തത്തിന്റെ വരവറിയിച്ച് ഗൗഡ സാരസ്വത ബ്രാഹ്മണ കുടുംബങ്ങളില്‍ ചൂടി പൂജ

കാഞ്ഞങ്ങാട്:വസന്തത്തിന്റെ വരവറിയിച്ച് പൂക്കള്‍ നിറയുന്ന ശ്രാവണ മാസത്തില്‍ ചൂടി പൂജ. ഗൗഡ സാരസ്വത ബ്രാഹ്മണ കുടുംബങ്ങളില്‍ മാത്രം നടക്കുന്ന ആചാര പൂജയാണ് ചൂടി പൂജ. കാസര്‍കോട്-കാഞ്ഞങ്ങാട്ടെ ഗൗഡസാരസ്വത സമൂഹത്തിന്റെ വീടുകളില്‍ ചൂടി പൂജ നടന്നു. കുടുംബത്തില്‍ സര്‍വ്വ മംഗളം വരാനായി സുമംഗലികളാണ് പരമ്പരാഗത അനുഷ്ഠാന രീതിയില്‍ ഇത്തരത്തില്‍ തുളസി പൂജ നടത്തുന്നത്. വീട്ടു മുറ്റത്തെ തുളസി ചെടിയും സൂര്യദേവനും ആരാധിക്കപ്പെടുന്ന ഈ പൂജ നടത്തുന്നത് വെള്ളി, ഞായര്‍ ദിവസങ്ങളിലാണ്. കര്‍ക്കടകവാവ് കഴിഞ്ഞു വരുന്ന ശ്രാ വണ മാസത്തിലെ വെള്ളി ശനി ഞായര്‍ ദിവസങ്ങളിലാണ് ചൂടി പൂജ. കര്‍ക്കിടക വാവിന് ശേഷമുള്ള വാവിന് മുന്‍പ് പൂജ നടത്തണമെന്നതും ഇതിന്റെ പ്രത്യേകതയാണ്. കുളിച്ച് ശുദ്ധിയായി മധുര നിവേദ്യം തയ്യാറാക്കുന്നതോ ടെയാണ് പൂജാ കര്‍മ്മങ്ങള്‍ക്ക് തുടക്കമാകുന്നത്. കറുക, മുക്കുറ്റിപൂവ്, ഹനുമാന്‍കിരീട പുഷ്പം, മീശ പൂവ്, ശീപോതിപൂവ് തുടങ്ങി വീട്ടുമുറ്റത്തെ സുലഭമായ പൂക്കളും ഔഷധസസ്യങ്ങളും ലഭ്യമായ മറ്റു പൂക്കളും ചേര്‍ത്തുകെട്ടി ചൂടി അതായത് കൊച്ചു പൂച്ചെണ്ട് ഉണ്ടാക്കിയാണ് പൂജ ചെയ്യുന്നത്, ഇങ്ങനെ വിവിധ പൂക്കള്‍ ചേര്‍ത്ത് ചരട് കൊണ്ട് കെട്ടുന്നതിനാലാണ് ചൂടിപൂജ എന്ന പേരില്‍ അറിയപ്പെടുന്നത്. ഈ ചൂടി കൊണ്ട് തുളസി പൂജ നടത്തുന്നതാണ് പ്രധാന ചടങ്ങ്. മറ്റെല്ലാ പൂജകളിലും പുരുഷന്മാരുടെ പങ്കാളിത്തം ഉണ്ടാകാറുണ്ടെങ്കിലും ചൂടി പൂജ നടത്തുന്നത് സ്ത്രീകള്‍ മാത്രമാണ്. രാവിലെ തുടങ്ങി ഉച്ചയ്ക്ക് 12 മണിക്ക് മുമ്പ് പൂജ അവസാനിക്കുന്നു. വീടിന്റെ പ്രധാന വാതില്‍ പടിയിലും പൂജാമുറിയും പ്രത്യേക ആരാധനയുണ്ട്. രണ്ട് ഭാഗത്തും ഓരോ ചൂടി വെച്ച് കത്തിച്ച നിലവിളക്കുമായാണ് വാതില്‍പടി കയറി വീട്ടിനകത്തേക്ക് പ്രവേശിക്കുന്നത്. പൂജകള്‍ക്കുശേഷം മുതിര്‍ന്ന സുമംഗലികളായ സ്ത്രീകള്‍ക്ക് ചൂടി കൈമാറി കാല്‍ തൊട്ട് വണങ്ങി അനുഗ്രഹം തേടുന്നു. പുതുതായി വീട്ടിലെത്തിയ സുമംഗലികളായ പെണ്‍കുട്ടികള്‍ ഉണ്ടെങ്കില്‍ അവരും പൂജയില്‍ പങ്കെടുക്കുന്നു. അടുത്ത ബന്ധുക്കളും മറ്റും ചടങ്ങില്‍ പങ്കെടുക്കാറുണ്ട്. കാഞ്ഞങ്ങാട് പ്രദേശത്തെ വിവിധ ഗൗഡ സാരസ്വത ബ്രാഹ്മണ കുടുംബങ്ങളില്‍ ചൂട് പൂജ നടന്നത്.

One Reply to “വസന്തത്തിന്റെ വരവറിയിച്ച് ഗൗഡ സാരസ്വത ബ്രാഹ്മണ കുടുംബങ്ങളില്‍ ചൂടി പൂജ

  1. നന്നായി പൂജാ വിശേഷങ്ങളും
    ദൃശ്യവല്കരണങ്ങളും..
    കുറച്ചു കൂടെ ശ്രദ്ധിച്ചാല് മികച്ചതാക്കാം.. 💜💜🙏

Leave a Reply

Your email address will not be published. Required fields are marked *